අපි සමගි ජන බලවේගය
2015 දී පරදවන ලද දූෂිත පවුල් පාලනය යළිත් ගොඩනැගෙමින් තිබේ. එය පරාජය නොකළහොත් රාජපක්ෂ පවුලට සුපුරුදු නාස්තිය, දූෂණය හා අත්තනෝමතිකත්වය විසින් මේ රට මහා ව්‍යසනයකට ඇද දමනු නියතය.
එහෙයින් එය පැරදවිය යුතුය. එසේම එය පැරදවිය හැකිය.
2015 දී අප සියලු දෙනා එකට එක්සත්ව පරාජය කරනු ලැබුවේ මහා බලසම්පන්න යැයි කියූ, සදාකල්හිම බලයේ සිටිතැයි කියූ ආණ්ඩුවක් බව අමතක නොකළ යුතු වෙමු. එසේම එදා මහින්ද රාජපක්ෂගේ රජය පිරිහීම ආරම්භ වීමට වසර ගණනාවක් ගත කළත්, මේ ගෝඨාභය රාජපක්ෂගේ ආණ්ඩුව ගත වූ කෙටි කාලය ඇතුලතම තම නොහැකියාව, අවුල්සහගතබව සහ අකාර්යක්ෂමතාව ඔප්පු කොට හමාරය. එහෙයින්, මේ රටේ නියම ප්‍රජාතන්ත්‍රවාදී බලවේගය ලෙස අප නිවැරදිව, ශක්තිමත්ව හා නැවුම්ව ගොඩ නැගුනොත්, එදා මෙන්ම මේ රජය මෙවරද ගෙදර යැවීම දුෂ්කර දෙයක් නොවේ. මේ මොහොතේදී අප තේරුම් ගත යුතු සත්‍යය එයයි.
නමුත් ඒ සඳහා අපට අලුත් සහ ශක්තිමත් ආරම්භයක් අත්‍යවශ්‍යය. මෙය අපේ පැත්තේම සිටින පැරණි, දූෂිත සහ ගතානුගතික කණ්ඩායම් සමග කළ හැක්කක් නොවේ. ඇත්තෙන්ම අප පැරදුනේම ඔවුන් නිසාය. 2015 දී ජනතාව අප කෙරෙහි තැබූ විශ්වාසය වසර කිහිපයක් තුළ දෙදරා යාමට මහබැංකු වංචාව සහ ඩීල් දේශපාලනය වැනි ඔවුන්ගේ අවිචාරවත් ක්‍රියාකාරකම් හේතු විය. එහෙයින් අලුත් නායකත්වයක් සහ අලුත් වැඩපිළිවෙලක් මත නිර්මාණය වන අලුත් මහජන බලවේගයක් නිසැකවම අවශ්‍යය. සජිත් ප්‍රේමදාස මැතිතුමන්ගේ නායකත්වයෙන් සමගි ජන බලවේගය ගොඩ නැගී ඇත්තේ ඒ සඳහාය.
එක් අතකින්, බෝඩ්ලෑලි කෙසේවෙතත්, එක්සත් ජාතික පක්ෂයේ හිසත්, හදවතත්, පක්ෂයේ මුළුමහත් සාමාජිකත්වයත් ඇත්තේ මෙතැනය. අනෙක් අතට, අත්තනෝමතිකත්වයට සහ දූෂණයට එරෙහි, එමෙන්ම රටට යහපත් හෙටක් සැදීමේ අභිලාෂයෙන් මැඩුණු, පක්ෂවලට තදින් නොබැඳුනු මැදහත් ඡන්දදායකයා බලාපොරොත්තු වන වෙනස ඇත්තේද මෙතැනය. මේ ප්‍රජාතන්ත්‍රවාදයේ තැනය; මේ වංචාවට සහ දූෂණයට විරුද්ධ තැනය; මේ අලුත් මිනිසුන්ගේ තැනය; මේ දෙපැත්තේම සිටින පැරණි, දූෂිත, ගතානුගතික බලවේග පරදවා අලුත්, යහපත් රටක් හෙට දින ගොඩනගන තැනය. මේ ඔබේ තැනය.
අපි සමගිව, එකට එක්ව ජයගනිමු.
මම පාඨලී චම්පික රණවක
මේ මහමැතිවරණයට මා ඉදිරිපත්වන්නේ මා සතු යුතුකම් සහ වගකීම් ඉටුකළ එසේම පසුගිය මහමැතිවරණයේදී ඔබ මට දුන් ඡන්දයට වටිනාකමක් හා ගරුත්වයක් ලබා දුන් කෙනෙකු ලෙසට වූ ආත්ම තෘප්තියෙන් යුතුවය.
මා දේශපාලනයේ මෙතෙක් දුර පැමිණ ඇත්තේ පවුල් උරුමයේ හෝ අයුතු ධන බලයේ අනුහසින් නොව කුසලතාවයේ හා ප්‍රතිපත්තිගරුකභාවයේ පිහිටෙනි. දේශපාලනයට පිවිසි දා පටන්ම මාගේ අධිෂ්ඨානය වූයේ සාධාරණ හා යුක්තිසහගත සමාජයක් සහ ශක්තිමත් හා සමෘද්ධිමත් රටක් ගොඩනැගීමය. ඒ වෙනුවෙන් අනේකවිධ කැපකිරීම් කළෙමි; දුක්ගැහැට වින්දෙමි. අතිබහුතරයක් දෙනා වැරැද්ද, නිවැරැද්ද ලෙස ගෙන කටයුතු කරත්දී, නිවැරැද්ද වෙනුවෙන්ම තිරව පෙනී සිටිමින් ඒ නිවැරදි ප්‍රතිපත්තීන් සහ බලවේග ජයග්‍රහණය කරවීමට කටයුතු කළෙමි.
දේශපාලනයේදී අපට හැමවිටම මග පෙන්වූයේ ප්‍රතිපත්තිගරුකභාවය සහ අවංකභාවයයි. ත්‍රස්තවාදය යුද්ධයෙන්ම පරාජය කළ යුතුයැයි කිසිවෙකුත් නොකියන කාලයක, ඒ බව නොබියව කීවෙමු. එසේම, යුද්ධය අවසන් වූ පසුව, අවසන් වූ යුද්ධයට මුවා වෙමින් මහා ආර්ථික ඝාතනයක සහ මංකොල්ලයක යෙදෙන්නට වූ විට ඒ බව පෙන්වා දෙන්නටත්, ඊට එරෙහිව කටයුතු කරන්නටත්, අවසානයේදී ඒ අත්තනෝමතික, පවුල් පාලනය පරාජය කරන්නටත් කටයුතු කළෙමු.
එසේම දොළොස් වසක් තිස්සේ ඉතා බලගතු අමාත්‍යධූර කිහිපයක්ම දැරුවත්, කිසිදු දිනක කිසිදු වංචාවක හෝ දූෂණයක නොයෙදෙන්නට අපි වග බලා ගත්තෙමු. අදටත් අපට ඍජුව, නිර්භයව සහ ස්වාධීනව කටයුතු කරන්නට හැකියාව ලැබී ඇත්තේ ඒ පිරිසිදුභාවය නිසාමය.
එසේම, එදා මෙදාතුර අප වගකීම දැරූ සෑම ආයතනයක්ම නිර්මාණශීලීව සහ කාර්යක්ෂමව මෙහෙයවමින් ඒවා මූල්‍ය අර්බුදවලින් ගලවාගෙන, ලාභ උපයන, රටට ණය නැති ආදර්ශ සම්පන්න ආයතන බවට පත්කිරීමට අපට හැකිවිය.
ඒ අයුරින්ම 2015 අගෝස්තුවේදී ඔබ මා හට ලබා දුන් ජනවරමටද මම උපරිම සාධාරණත්වය ඉටු කළෙමි. ඔබව අගෞරවයට හෝ ලැජ්ජාවට පත්වන කටයුතු කිසිවක් සිදු නොකළෙමි. එහෙයින් තවත් ජනවරමක් සඳහා ඔබ ඉදිරියට නොපැකිලව පැමිණීමේ හැකියාව මා සතු යැයි විශ්වාස කරමි.
එසේම අනාගතයේ අප ඉදිරිපිට ඇති අභියෝගය හා කාර්යභාරය පිළිබඳවද අප දැනුවත්ය. රාජපක්ෂලාගේ අත්තනෝමතික, දූෂිත සහ ව්‍යසනකාරී පවුල් පාලනය ඉදිරියේ නොසැලී, නොනැමී ඍජුව සිටගැනීමේ හා සටන් කිරීමේ ශක්තියද, ඒ අධිෂ්ඨානයද මා සතු බව ඔබ හොඳින්ම දන්නා බව මම දනිමි.
මේ අප සමගිව එකට එක්ව ජය ගත යුතු සටනකි.
ඒ සඳහා ඔබ අප කෙරෙහි තැබූ විශ්වාසය මේ තාක් සුරැකි අයුරින්ම හෙටද ඔබගේ ගෞරවය සහ විශ්වාසය සුරකිමි.
